வசதியான அகதி

எங்கள் வயலில்
அறுத்த கதிரில்
எடுத்த அரிசியை

அம்மம்மா நனையவிட்டு
கல்லுரலில் தாளகதியில்
மாத்துலக்கை போட்டு
மாவாக எடுத்து
விறகடுப்பில் வறுத்து
இடியப்பம் அவித்து வைக்க

அம்மா
அம்மியில் தேங்காய் செத்தல்
சரக்குகள் வைத்து
இழுத்தரைத்த சட்னியோடு
இடியப்பத்தை சுவைத்து

அவசர கதியில் நட்ராஜ்
கொம்பாசை எடுத்து
அங்கிங்கேங்கும் இறைந்திருந்த
பேனையும் பென்சிலையும் தேடி
அதற்குள் திணித்து
புத்தகப்பை பையை தேடி
தோளில் போட்டு

கால் நடையாக பாடசாலை
சென்ற நாள்
தந்த இன்ப சுகங்கள் ஏதும்

இங்கு காரில்
டிம்ஹோட்டன் கோப்பியை
உறிஞ்சியபடி
மக்டோனால் சான்விச்சை
கடிக்கையில்
வர மறுக்கின்றதே
ஏன்?

இங்கு நான்

வெளிநாட்டில்
வசதியான அகதி

வல்வையூரான்.

	Tweet

Post Comment